Галоўная старонка Навіны Пра праект Кантакт Спасылкі Кнігі ў PDF/DJVU Канвэртар лацінкі Бібліяграфія
Шукаць:    
 
 толькі ў назьве   шукаць ва ўсіх    віртуальная клявіятура Уставіць беларускае "і" Уставіць у-кароткае (ў)
 
 
 

Сокалаў Сяргей (творчае імя: Сяргей Сокалаў-Воюш; 16.10.1957, в. Астроўшчына Полацкай вобл. (цяпер в. Ветрына Полацкага р-ну Віцебскай вобл.)), актывіст незалежніцкага руху 1980-х; паэт, бард, перакладчык.

Вучыўся ў Астроўшчынскай, Гаранскай і Наваполацкай школах. Па заканчэньні працаваў сьлесарам на заводзе жалезабэтонных канструкцыяў (1974-1976). Пасьля службы ў войску (1976-1978) працаваў у Полацку на вытворчым аб'яднаньні «Полімір» (1979). У тым жа годзе паступіў на філфак БДУ, пасьля трэцяга курсу перайшоў на завочнае аддзяленьне і з 1982 выкладаў беларускую мову і літаратуру ў школе № 5 Наваполацку. Пазьней працаваў навуковым супрацоўнікам у філіі Музэю Якуба Коласа ў Мікалаеўшчыне. У чэрвені 1985 менавіта ў Мікалаеўшчыне адбывалася сьвяткаваньне «Майстроўняй» Купальля, удзельнікі якога былі затрыманыя КГБ. Тады С. пазбавіўся працы.

З 1990 - на творчай працы. Сябра Саюзу пісьменьнікаў Беларусі з 1990.

Падчас вучобы ў БДУ быў адным з заснавальнікаў «Майстроўні». У сярэдзіне 1980-х сябра літаб'яднаньня «Тутэйшыя», наваполацкага экалягічнага руху «Сакавік», з 1989 - сябра БНФ.

Літаратурную дзейнасьць пачаў у газэце «Хімік» (1973), публікаваўся ў альманаху «Дзень паэзіі», часопісах «Маладосць», «Крыніца», газэце «ЛіМ», актыўна друкаваўся ў самвыдаце: «Літаратура», «Ксэракс беларускі», «Кантроль». Разам з В.Вячоркам і С.Дубаўцом пад калектыўным псэўданімам «Беларуская Талеранцыйная Грамада» выпускаў самвыдавецкую газэту «Люстра дзён» (1979-1980). Вядомы як беларускі паэт і бард, у другой палове 1980-х ягоныя вершы і песьні карысталіся вялікай папулярнасьцю, але ўлады чынілі перашкоды канцэртнай дзейнасьці, С. знаходзіўся пад пільнай увагай КГБ. Традыцыйнымі сталі падпольныя выступы барда ў Менску. Песьні з рамантычнага «Касінэрскага цыклю» гучалі літаральна на кожнай імпрэзе, «Я - нефармальны беларус» і «Фронт» сталі гімнамі Адраджэньня 1980-х. У ЗША і Канадзе выйшлі плыты зь песьнямі С. У 1989 выдаў паэтыцкі зборнік «Кроў на сумётах».

У 1991 па сямейных абставінах С. пераехаў у ЗША. Цяпер С. - журналіст Беларускай рэдакцыі Радыё «Свабода» ў Празе.

Тв.: 1. Кроў на сумётах. - Менск, 1989.

Ларыса Андросік

Дэмакратычная апазыцыя Беларусі (1956-1991). Даведнік   Дэмакратычная апазыцыя Беларусі (1956-1991). Даведнік
Галоўная старонка   Галоўная старонка
Даслаць ліст адміністратару Заўважылі недакладнасьць?
Паведаміце нам!
    (с) Электронная Энцыкляпэдыя, 2003-2019