Галоўная старонка Навіны Пра праект Кантакт Спасылкі Кнігі ў PDF/DJVU Канвэртар лацінкі Бібліяграфія
Шукаць:    
 
 толькі ў назьве   шукаць ва ўсіх    віртуальная клявіятура Уставіць беларускае "і" Уставіць у-кароткае (ў)
 
 
 

Клас (class), сацыяльная група, якая вызначаецца яе становішчам у працэсе вытворчасці або на рынку; паняцце найбольш распрацоўвалі ў марксізме;

клас абазнаны (knowledge class), тэрмін тэорыі пасляіндустрыйнага грамадства паводле Д.Бэла, які абазначае навукоўцаў і наагул экспертаў, якім, на думку Бэла, будзе належаць улада ў пасляіндустрыйным грамадстве ў адрозненне ад індустрыйнага, дзе ўладу маюць бізнесоўцы;

клас вытворчы, тое сама, што і прадукцыйны клас;

клас вышэйшы (upper class), клас, які займае вышэйшую пазіцыю ў сацыяльнай гіерархіі, эліта, панавальны клас;

клас збежны (declining class), клас, які занепадае, траціць былы ўплыў і ўладу, нават цалкам знікае;

клас ідэалагічны (ideological class), тэрмін марксізму, які пазначае тыя сацыяльныя групы, заданнем якіх ёсць апраўданне, або легітымацыя, актуальнага сацыяльнага парадку;

клас кіраўнічы (ruling class), клас, які ажыццяўляе кіраванне грамадствам; эліта, панавальны клас;

клас лайдацкі (leisure class), паняцце сацыялогіі Т.Вэблена, які так абазначыў эліту грамадства; тэрмін звязаны з канцэпцыяй дэманстрацыйнага спажывання;

клас марнатраўны (idle class), тэрмін Сэн-Сымонавай тэорыі індустрыйнага грамадства; абазначае сацыльныя групы, якія не займаюцца прадукцыйнай працай; на думку Сэн-Сымона, да іх належаць святары, урадоўцы, вайскоўцы і да т.п.;

клас мінучы (transition class), тэрмін Марксавай тэорыі класаў, якім пазначаюцца сацыяльныя групы, чыё існаванне пярэчыць эвалюцыі грамадства, таму яны мусяць знікнуць;

клас набытковы (acquisition class), паводле Вэбэравай тэорыі сацыяльнай стратыфікацыі, клас, прадстаўнікі якога жывуць з таго, што прадаюць свой прафесійны спрыт; процілеглы ўласніцкаму класу;

клас небяспечны (dangerous class), паняцце сацыяльнай тэорыі К.Маркса, якое абазначае маргінальныя групы, што сваім існаваннем пагражаюць усталяванаму парадку рэчаў;

клас непрадукцыйны (non-productive class), тое сама, што і марнатраўны клас;

клас ніжэйшы (lower class), клас, што займае ніжэйшыя прыступкі сацыяльнай лесвіцы; іначай кажучы, падпарадкаваны, або падлеглы клас;

клас падлеглы (subject class), клас, які падпарадкуецца накінутаму элітай парадку; бяздзейны клас, які ёсць аб'ектам, а не суб'ектам палітыкі;

клас палітычны (political class), у сацыялогіі Г.Москі клас, які займаецца палітычнай дзейнасцю і адрозна ад панавальнага класа, паводле Маркса, выяўляе не толькі эканамічны інтарэс пэўнага класа, але і агульны інтарэс цэлага грамадства;

клас панавальны (dominant class), клас, які ўсталяваў і ажыццяўляе сваё панаванне ў грамадстве; клас, за якім прызнаюць права на панаванне, на вызначэнне прынцыпаў сацыяльнага парадку;

клас паслуговы (service class), тэрмін аўстра-марксіста Рэнэра, якім ён абазначыў сярэдні клас у навейшыя часы індустрыйнага капіталізму (1910-я гг.); той клас складаецца з работнікаў, якія жывуць з таго, што прадаюць свой прафесійны спрыт; у пэўнай ступені тэрмін адпавядае Вэбэраваму паняццю дадатна ўпрывілеяванай групы;

клас прадукцыйны (productive сlass), у Сэн-Сымонавай тэорыі індустрыйнага грамадства групы, якія займаюцца карыснай для грамадства працай;

клас працоўны, тое сама, што і работніцкі клас;

клас работніцкі (working class), клас, які жыве з таго, што прадае сваю работу;

клас сярэдні (middle class), клас, які ў структуры грамадства займае становішча паміж вышэйшым і ніжэйшым класам і такім чынам забяспечвае стабільнасць грамадства; тэрмін, уведзены яшчэ Арыстотэлем;

клас узбежны (rising class), клас, які ўбіраецца ў сілу ды імкнецца да ўсталявання свайго панавання ў цэлым грамадстве;

клас уласніцкі (ownership class), паняцце Вэбэравай тэорыі сацыяльнай стратыфікацыі; абазначае групу людзей, якія жывуць з уласнасці (г.зн. землеўладальнікі, уласнікі пэўнага капіталу, які яны інвестуюць, і да т.п. людзі), а не прадаюць свой прафесійны спрыт, як набытковы клас;

клас урадавы (governing class), група індывідаў, якія ажыццяўляюць кіраванне грамадствам, займаючы пэўнае становішча ва ўрадзе.

Малы тлумачальны слоўнік сацыялагічных тэрмінаў   Малы тлумачальны слоўнік сацыялагічных тэрмінаў
Галоўная старонка   Галоўная старонка
Даслаць ліст адміністратару Заўважылі недакладнасьць?
Паведаміце нам!
    (с) Электронная Энцыкляпэдыя, 2003-2019