Дададзены Слоўнік беларускай безэквівалентнай лексікі (у расейскамоўным дачыненні).

Беларуская безэквівалентная (у расейскамоўным дачыненні) лексіка яшчэ не стала аб'ектам спецыяльнага вывучэння лексіколагаў. Гэты слоўнік — першая спроба ўвесці ў навуковы зварот пэўную колькасць (каля 900) лексічных адзінак, якія не маюць у расейскай мове аднаслоўнага адпаведніка і перадаюцца апісальным спосабам. Слоўнік дае магчымасць чытачу пазнаёміцца з тыповымі беларускімі рэаліямі, адчуць нацыянальны каларыт беларускай лексікі, пераканацца ў яе значных камунікатыўных і выяўленчых магчымасцях. Прызначаны для беларуска- і расейскамоўных чытачоў, ён будзе карысным для студэнтаў, настаўнікаў, выкладчыкаў, перакладчыкаў, журналістаў і інш.

Дададзены энцыкляпэдычны даведнік «Драўляныя цэрквы Беласточчыны».

Дададзеныя ангельска-беларускі і беларуска-ангельскі слоўнікі выдавецкіх і паліграфічных тэрмінаў.

Такі слоўнік выдаецца ў Беларусі ўпершыню. Тут сабраная сучасная тэрміналогія з галіны кнігавыдання, друкарскай справы, а таксама кнігараспаўсюджання. Слоўнік змяшчае па дзве з паловай тысячы тэрмінаў у кожнай моўнай версіі. Для выдаўцоў, паліграфістаў, кнігазнаўцаў, мовазнаўцаў-тэрмінолагаў. Будзе карысны таксама студэнтам і аспірантам адпаведных спецыяльнасцяў.

Выйшла з друку Кароткая энцыклапедыя старасьвеччыны Вацлава Ластоўскага.

Вацлаў Ластоўскі. Кароткая энцыклапедыя старасьвеччыны
Менск: выдавец В.Хурсік, 2003.
Укладальнік Язэп Янушкевіч
Наклад 300 асобнікаў

Дададзены энцыкляпэдычны слоўнік «Міфы Бацькаўшчыны».

Гэта кніга ўпершыню зьбірае пад адзінай вокладкай народныя ўяўленьні пра старажытных багоў, дэманаў, нячысьцікаў, якімі насяляў калісьці беларус сваё жытло, гаспадарчыя забудовы, навакольле, сусьвет. Спроба звесьці разам усе міфалагічня постаці ня зможа не зацікавіць чытача, які адчувае і ацэніць багацьце ўяўленьняў і фантазіі, спрадвеку ўласьцівых нашаму народу.

Энцыклапедыя Архітэктура Беларусі.

Архітэктура Беларусі: Энцыклапедычны даведнік.
Менск: Беларуская Энцыклапедыя, 1993. - 620 с.: іл.
ISBN 5-85700-078-5
Наклад: 10.000 асобнікаў.

У аднатомнай энцыклапедыі змешчана больш за 1.200 артыкулаў, прысвечаных лепшым творам беларускай архітэктуры 12-20 ст. Чытач можа знайсці інфармацыю пра выдатныя памнікі дойлідства, якія ўвайшлі ў скарбніцу шматнацыянальнай культуры народаў нашай краіны. У кнізе ёсць даведкі і пра лепшыя ансамблі і асобныя будынкі савецкага часу. У томе таксама змешчаны тэрміналагічны слоўнік, біяграфічныя артыкулы. Выданне багата ілюстравана каляровымі і чорна-белымі здымкамі, малюнкамі і чарцяжамі.

Энцыклапедыя Археалогія і нумізматыка Беларусі.

Археалогія і нумізматыка Беларусі: Энцыклапедыя.
Менск: Беларуская Энцыклапедыя, 1993. - 702 с.: іл.
ISBN 5-85700-077-7
Наклад: 15000 асобнікаў.

У аднатомніку змешчана каля 2.500 артыкулаў, з іх больш за 400 па нумізматыцы. У артыкулах па археалогіі асветляюцца ўсе археалагічныя культуры, якія існавалі на тэрыторыі Беларусі, усе тыпы археалагічных помнікаў (стаянкі, паселішчы, гарадзішчы, селішчы, могільнікі, свяцілішчы і інш.), а таксама помнікі архітэктуры ранняга сярэднявечча (мураваныя храмы, замкі, палацы), рэчы матэрыяльнай культуры і ўнікальныя творы першабытнага мастацтва. У артыкулах па нумізматыцы прадстаўлена грунтоўная інфармацыя па ўсіх пытаннях манетнай справы. Выданне багата ілюстравана каляровымі і чорна-белымі здымкамі, мапамі, планамі і схемамі. Разлічана на выкладчыкаў і студэнтаў ВНУ, настаўнікаў сярэдніх школ і ўсіх, хто цікавіцца гісторыяй Беларусі.

Энцыклапедыя Этнаграфія Беларусі.

Этнаграфія Беларусі: Энцыклапедыя.
Менск: Беларуская Савецкая Энцыклапедыя, 1989. - 575 с.: іл.
ISBN 5-85700-014-9
Наклад: 20.000 асобнікаў.

У аднатомніку змешчана больш за 3.000 артыкулаў, якія асвятляюць пытанні матэрыяльнай і духоўнай культуры беларускага народа. Артыкулы энцыклапедыі прысвечаны агульным паняццям этнаграфіі, этнічным групам, тыпам і відам паселішчаў, збудаванняў і іх частак, промыслам і рамёствам, нацыянальнаму адзенню і г.д. Шырока прадстаўлена традыцыйная беларуская кухня. Кніга багата ілюстравана каляровымі і чорна-белымі здымкамі, малюнкамі і чарцяжамі. Выданне адрасавана этнографам, краязнаўцам і ўсім тым, хто цікавіцца гісторыяй матэрыяльнай і духоўнай культуры беларускага народа.