ураг — наравісты, няўступлівы.
Як уродзіцца ўраг, дык і памрэць урагам.

урагі — наравы, капрызы.
Я з цябе твае ўрагі выб'ю, ты мне не варанджайся. Такі ўжо наравісты конь быў у яго, поўны косці ўрагаў.

ураджэнец — свой, тутэйшы.
Ён ураджэнец, а тут сусвецця з'ехалася.

урадна — святочна, паглядна, урачыста.
У госці надзеўся ўрадна. Ён сягоння такі ўрадны - хоць пад вянец. Настольнік заслалі ўрадны, каляровы. Я ва ўраднай хусцінцы так і хаджу цэлы дзень.

урод, урода — ураджай, спор.
Гэтым летам німа ўроду, дык німа нідзе сена, німа ўраджаю. Сёлета на агуркі не такая ўрода.

уроіцца, роіцца — здасца, прымроіцца.
Уроілася ёй, што злодзя ў хату ломіцца, дык ад крыку зашлася. І што гэта яму ўроілася, быць я не прывеціла яго.

уручча — кій, палка, кавенька, папірушка.
Хоць якое ўручча ў руку ўзяць, усё ж прыступней ісці.

урэзацца — моцна закахацца (з усмешкай).
Я ўлюбілася, я урэзалася, // Без нажа, малада, я зарэзалася.