Назовы жывёл (БНТ)

(1036 артыкулаў)

Назовы жывёл (БНТ)

Створана на падставе:

Назовы жывёл. Менск: Інбелкульт, 1927.

Прадмова

У гэтым выпуску „Беларускае Навуковае Тэрмінолёгіі” зьмешчаны назовы пераважна тых жывёл, якія сустракаюцца ў межах Беларусі, а таксама тых, што ўспамінаюцца ў элемэнтарных падручніках па прыродазнаўстве. Пры ўкладаньні проекту назоваў былі выкарыстаны матар’ялы, зьмешчаныя ў слоўніку Насовіча, у „Маскоўска-Крыўскім слоўніку” Ластоўскага і ў іншых друкаваных выданьнях, а таксама матар’ялы, сабраныя А. Фядзюшыным і іншымі членамі Інстытуту Беларускае Культуры.

На жаль, пры ўкладаньні гэтага зборніку яшчэ не маглі быць выкарыстаны ўсе матар’ялы Слоўніка-Тэрмінолёгічнай Камісіі Інбелкульту, атрыманыя ў вялікім ліку за апошнія часы ад краязнаўчых організацый Беларусі і ад корэспондэнтаў Інбелкульту. Зразумела, што Прыродазнаўчая Сэкцыя глядзіць на гэты сшытак, як на проект, які толькі часова можа адыгрываць ролю даведніка для настаўніка прыродазнаўства ў беларускай сярэдняй школе.

Кожны радавы лацінскі назоў перадаваўся адпаведным беларускім словам і, па магчымасьці, назовы відаў адпаведна перададзены ў беларускай мове двума словамі. Лацінскія назовы ўзяты часткова з кніг: „Л. С. Берг. Рыбы пресных вод России. 2 изд. Госиздат, 1923”, „М. А. Мензбир. Птицы России. Изд. 2. Москва. 1895”, часткаю з падручнікаў для вышэйшай і сярэдняй школы, ды з іншых крыніц.

Складзены М. Азбукіным проект назоваў разглядаўся спэцыяльнай Тэрмінолёгічнай Камісіяй пры Прыродазнаўчай Сэкцыі Інбелкульту ў складзе І. Серады, А. Фядзюшына, Я. Каранеўскага, М. Поўзік і Яцанткоўскага. З боку мовы і правапісу беларускія назовы жывёл перагледжаны Правапісна-Тэрмінолёгічнай Камісіяй Інбелкульту.

Выпуск дапушчаны да выданьня Прэзыдыумам Прыродазнаўчай Сэкцыі ІБК.

Паведаміць пра недакладнасьць