Україно, ми з тобою !
Галоўная старонка Навіны Пра праект Кантакт Спасылкі Кнігі ў PDF/DJVU Канвэртар лацінкі
Шукаць:    
 
 толькі ў назьве   шукаць ва ўсіх    віртуальная клявіятура Уставіць беларускае "і" Уставіць у-кароткае (ў)
 
 
 

«Талака» (Менск), незалежніцкае арганізацыя моладзі ў сярэдзіне - другой палове 1980-х, гісторыка-культурнае аб'яднаньне. Т. утваралася ўвосень 1985 як клюб аховы помнікаў; стала пераемніцай «Майстроўні» і моладзевага клюбу імя Ў.Караткевіча. У пэрыяд да 1989 Т. стала самай вялікай і ўплывовай нефармальнай арганізацыяй. Ля вытокаў яе заснаваньня былі С.Вітушка, В.Вячорка, В.Івашкевіч, А.Суша.

Т. аб'ядноўвала блізу 60 сябраў, але ў сходах і талоках удзельнічала значна большая колькасьць людзей. Т. мела некалькі кірункаў сваёй дзейнасьці: удзел у рэстаўрацыйных работах і археалягічных раскопах, ахова помнікаў гісторыі і архітэктуры, змаганьне за стварэньне беларускіх клясаў і школаў, правядзеньне экалягічных экспедыцыяў, культурна-асьветніцкая дзейнасьць, адраджэньне народных сьвятаў. Традыцыйным стала штогадовае правядзеньне Купальля, Калядаў, Гуканьня Вясны. У насьценгазэце «Ратуша» адлюстроўвалася дзейнасьць суполкі. У 1986-1987 талакоўцы наладзілі выпуск самвыдавецкага «Бурачка», у 1989 выпусьцілі гумарыстычнае выданьне «Брук», прымеркаванае да 23 лютага (дзень Савецкай арміі).

Разам зь іншымі суполкамі Т. удзельнічала ў падрыхтоўцы і правядзеньні масавых палітызаваных мерапрыемстваў: «Дзьвінскае ралі'87», мітынг у абарону Верхняга гораду (1988); «Прыпяць'88»; мітынгі ў Курапатах і на Ўсходніх могілках, антыракетны паход (1990) і інш.

Т. была адным зь ініцыятараў стварэньня Канфэдэрацыі Беларускіх Суполак і БНФ «Адраджэньне».

Кр.: 1. ANH: F-8/17; 2. ANH: F-9/4.

Літ.: 3. Залесский Б., Ильюшенко Н. Позиция или поза? // Вечерний Минск. 26.03.1988, 05.04.1988; 4. Отклики читателей на статьи «Позиция или поза» // Вечерний Минск. 25. 07.1988; 5. У.Гойтан. Чаго хочуць «талакоўцы»? // Звязда 17.08.1988 (вэрсіі артыкул: Чего хотят «талакоўцы»? // Сельский инженер (Белорусский институт механизации сельского хозяйства). 10.10.1988; Чего же хочет «Талака»? // Рабочее слово (Газета объединения «Атлант») // 11.10.1988); 6. Чаго хочуць «талакоўцы»? Рэха публікацыі // Звязда. 23.08.1988; 7. Чаго хочуць «талакоўцы»? Рэха публікацыі // Звязда. 31.08.1988; 8. Дети перестройки - неформалы. «Талака»: факты, споры, размышления // Интеграл. 25.08.1988; 9. Резонанс статьи «Дети перестройки - неформалы» // Интеграл. 29.08.1988; 10. Каравай А. Дык у чым я вінаватая? // Чырвоная Змена. 11.10.1988; 11. Эволюция политического невежества (Н.Дорожкин, А.Барданов, А.Филимонов, Д.Жмуровский, К.Доморад) // Вечерний Минск. 21.10.1988; 12. А.Соломонов. Старые ошибки в новых условиях // Знамя юности. 06.11.1988; 13. «Нефармалы»: супрацоўнічаць ці абвяргаць? // Беларускі універсітэт. 24.11.1988. № 31; 14. «Аб'яднацца, каб дзейнічаць зладжана» // Чырвоная Змена. 05.08.1989; 15. Садоўскі П., Вячорка В. Няўрадавыя арганізацыі і працэс пераўтварэньняў у Беларусі // Супольнасьць: Бюлетэнь для беларускіх няўрадавых арганізацыяў. № 1-2 (34) (сьнежань 1997 - студзень 1998); № 3-4 (5-6) (вясна 1998).

Ларыса Андросік

Дэмакратычная апазыцыя Беларусі (1956-1991). Даведнік   Дэмакратычная апазыцыя Беларусі (1956-1991). Даведнік
Галоўная старонка   Галоўная старонка
Даслаць ліст адміністратару Заўважылі недакладнасьць?
Паведаміце нам!
    (с) Электронная Энцыкляпэдыя, 2003-2014